Бензин бағасы қымбаттауда

Posted On: 17.02.2025

АИ-92 маркалы бензин ақпан айының соңына қарай 4 теңгеге қымбаттайды, деп хабарлайды LS редакциясы Қазақстанның мұнай өнімдері қауымдастығына (ҚМҚ) сілтеме жасап.

ҚМҚ мәліметінше, бензин мен дизель отынының бағасын мемлекеттік реттеу тоқтатылғаннан кейін, 1 ақпаннан бастап көтерме жеткізушілер бағаны өсірген. Олардың ішінде KC Energy Group және ҚазМұнайГаз компаниялары да бар. Қауымдастықтың айтуынша, бұл екі компания жанар-жағармай нарығының 80%-ын бақылауда ұстайды.

"Ақпан айындағы жанар-жағармай көлемін бөлшек саудамен айналысатын кәсіпкерлер көтерме бағада қымбат сатып алып жатыр. Дизель отыны мен АИ-92 бензинінің көтерме бағасы орта есеппен литріне 4 теңгеге өсті. Демек, ақпан айының соңына қарай, бұрынғы бағамен сатып алынған қор көлеміне байланысты, жанар-жағармайдың бөлшек бағасы да 4 теңгеге қымбаттайды. Бұл ретте, қосылған 4 теңгенің 80%-ы, яғни 3 теңгесі акциз түрінде мемлекеттік бюджетке аударылады", – деп түсіндірді қауымдастық өкілдері.

Бұған дейін, сарапшы Олжас Байділдинов LS-ке берген пікірінде Қазақстанда бензин бағасының біртіндеп қымбаттайтынын айтқан болатын. Бұл болжамды вице-премьер Қанат Бозымбаев та растады.